O Concello da Coruña puxo en marcha unha campaña de control enfocada nos patinetes eléctricos e outros vehículos de mobilidade persoal (VMP). A iniciativa lévase a cabo para aplicar a nova normativa existente para este tipo de transporte, “facendo un maior control do seu uso e fomentando a responsabilidade das persoas usuarias”.

Para realizar estes controis, a Policía Local promove un novo equipamento que facilita a verificación das condicións técnicas destes vehículos en circulación e a detección de modificacións irregulares na súa potencia ou velocidade. Así mesmo, o corpo municipal intensificará o control do cumprimento das obrigacións administrativas básicas, como son a inscrición no rexistro de vehículos privados lixeiros, dispor da correspondente etiqueta identificativa e contar co seguro de responsabilidade civil obrigatorio.

Así o explicou a concelleira de Seguridade Cidadá, Montserrat Paz, quen incidiu en que “o uso neglixente ou temerario destes vehículos supón un claro risco para manter a seguridade viaria na cidade”. Por este motivo, a responsable municipal remarcou que considera totalmente “imprescindible facer un esforzo extra de control e seguimento” nas rúas de cara aos vindeiros meses.