O portavoz do PP no Concello da Coruña, Miguel Lorenzo, destacou que ten un “gran proxecto de cidade, un gran equipo e ganas”. O seu obxectivo, anunciou, é poder repetir como candidato á Alcaldía da cidade herculina nas eleccións municipais que se celebrarán en maio de 2027 á espera de que o confirme o PPdeG a “principios de xuño”.

“Teño todo o seu apoio para seguir adiante neste traballo que estou a facer co meu equipo”, asegurou ao citar ao presidente do PP, Alberto Núñez Feijóo; da Xunta, Alfonso Rueda; e o provincial, Diego Calvo. No entanto, sinalou que é “Rueda quen ten que anunciar o candidato”. Así o manifestou durante unha convocatoria de medios con todo o seu equipo para facer balance ante os próximos comicios.

“Queremos unha cidade cómoda, amable, para todos os coruñeses, funcional, accesible competitiva e humana”, recalcou tras destacar “certas características” súas para ser alcalde como a súa “capacidade de traballo, a gran virtude de escoitar” e o seu “compromiso” coa cidadanía. “É a antesala para tomar boas decisións, algo do que carece Inés Rey“, apuntou respecto da alcaldesa herculina e lamentar que “A Coruña deixou de ser unha cidade de oportunidades”.

Así mesmo, Lorenzo reiterou que o seu obxectivo é “outra forma de gobernar tanto no fondo como nas formas para que A Coruña volva funcionar de novo”. Neste sentido, criticou a “falta de liderado” da actual rexedora, a súa “tremendamente preocupante” xestión económica e o “buraco urbanístico e social” no que sumiu á urbe. Todo iso, engadiu co “cómplice” do BNG.