O Tribunal Superior de Xustiza de Galicia (TSXG) ratificou senllas condenas da Audiencia Provincial da Coruña a dous homes por tráfico de drogas na cidade herculina e no municipio coruñés de Cambre, segundo informa o alto tribunal galego.

Nunha das resolucións, ratifícase a absolución a un home dos delitos de agresión sexual e exhibición de material pornográfico entre menores, pero condénaselle a tres anos e seis meses de prisión como autor dun delito contra a saúde pública, na súa modalidade de tráfico de substancia que non causa grave dano á saúde, agravada por facilitar a substancia a menores de 18 anos.

A súa detención produciuse despois de que un menor acudise ao domicilio do acusado en Cambre para comprar droga, en febreiro de 2024, e de comprobarse, tras a posterior denuncia formalizada por este, a venda de substancias na citada vivenda. En concreto, en marzo dese ano, a Garda Civil interceptou saíndo da casa do acusado a outro menor de 15 anos con droga, segundo recolle o fallo.

Por outra banda, o TSXG confirmou a condena a outro home como autor dun delito contra a saúde pública polo tráfico de estupefacientes. A pena que agora se ratifica e que fora imposta pola Audiencia Provincial da Coruña é de un ano e nove meses de cárcere.

O seu arresto produciuse en marzo de 2024 cando se atopaba nunha rúa da cidade herculina realizando actividades de intercambio ilícito de substancias estupefacientes, momento no que foi interceptado por axentes da Policía Nacional.