A conselleira de Economía e Industria, María Jesús Lorenzana, remarcou que a elección do candidato ou a candidata á Alcaldía da Coruña é “unha cuestión do partido”. Así se manifestou ao ser preguntada sobre a persoa que podería optar a ser o número un da candidatura despois de que nas últimas eleccións municipais se presentara o actual portavoz do grupo municipal do PP, Miguel Lorenzo.

Cuestionada, nun acto con empresarios na Coruña, sobre se se ve como candidata, a conselleira de Economía indicou que está no Goberno da Xunta. “Espero e desexo seguir estando (na Xunta), temos moito traballo por facer”, dixo para remarcar que se trata dun asunto que debe decidir o presidente do PPdeG, Alfonso Rueda, e o provincial, Diego Calvo.

RUEDA CONFÍA EN QUE MIGUEL LORENZO REPITA COMO CANDIDATO DO PP

Así as cousas, o titular do Executivo galego e presidente do PPdeG, Alfonso Rueda, mostrou a súa confianza en que o actual presidente do PP local coruñés e portavoz do grupo municipal no Concello da Coruña, Miguel Lorenzo, volva presentarse como candidato á Alcaldía. “Está a facer un traballo magnífico”, asegurou ante os medios na cidade herculina durante unha visita ás instalacións da empresa Coca-Cola. Con todo, precisou que será o próximo mes cando se fagan públicos os candidatos das cidades.

“Temos unha estratexia e unha planificación para presentar os candidatos, comezando polos das cidades”, indicou, lembrando que en xuño anunciarán os candidatos e as candidatas das urbes galegas. Rueda dixo comprender “as especulacións” tras terse difundido a posibilidade de que Miguel Lorenzo non repetise como candidato, pero insistiu en que o PP é un partido de “poucas improvisacións e moito traballo”. “Non me corresponde a min dicir quen vai ser, sinceramente; aínda que sexa presidente, creo moito nos procedementos internos que funcionan no Partido Popular de Galicia”, subliñou, antes de pedir respecto polos prazos dos órganos do partido para a toma de decisións.

RESPALDO AO TRABALLO REALIZADO POR LORENZO

Con todo, Rueda trasladou o seu apoio a Miguel Lorenzo “polo traballo feito ata agora durante moitos anos na oposición e polas expectativas de futuro”. “E, ademais, vendo os nervios que lles pon a algunhas persoas, creo que Miguel Lorenzo está a facer un traballo magnífico”, afirmou. “E, polo tanto, se me preguntan cal é a miña opinión, que o seu traballo é magnífico”, reiterou, aínda que matizou que unha cousa é o que lle agrade a el “e outra o que se teña que dicir”. “Eu agardo sinceramente que coincidamos, pero nunca me escoitarán dicir que tal persoa vai ser o candidato”, apostilou.