A Xunta de Goberno local da Coruña aprobou novas actuacións en barrios, ademais de autorizar a construción de novas vivendas no polígono de Visma, segundo informou o portavoz do goberno local, José Manuel Lage.
“Esperamos que as primeiras vivendas estean dispoñibles no primeiro trimestre de 2028”, aseverou nunha rolda de prensa na que sinalou que a espectativa é que o polígono se atope “na súa plenitude” en 2030.
Neste caso, a autorización é para o segundo edificio dunha urbanización que prevé a construción de 3.600 vivendas. Neste caso trátase dun edificio de Metrovacesa, con 100 vivendas con prezos que oscilan entre os 294.000€ (un primeiro de 2 habitacións) ata os 608.000€.
O obxectivo do consistorio, precisou, é que se constrúan “como mínimo” na cidade “11.000 vivendas novas”.
Obras nos barrios: Palavea, Lonzas, Castrillón e o Ensanche
Así o expuxo tras unha Xunta de Goberno local na que, indicou, deuse “un paso máis” no Plan de Barrios 2025-2027 con actuacións en Palavea, entre elas a licitación da biblioteca municipal e a aula informática. A iso, súmanse outras iniciativas como a renovación da iluminación en zonas da cidade.
Neste sentido, notificou que se aprobaron investimentos “por valor de 2,1 millóns para executar en Palavea, Lonzas, O Castrillón e Ensanche”:
- Deuse luz verde á saída a concurso das obras de construción da nova pista multideporte que se habilitará no parque Pierre de Coubertin, en Lonzas.
- Hoxe sairán a contratación as obras para mellorar a accesibilidade na travesía do Montiño, na parte baixa do Castrillón. A travesía está conectada coa rúa da Merced a través dunhas escaleiras, que permiten salvar a pé o desnivel existente, mais a día de hoxe acceder en cadeira de rodas ou cun carriño de bebé esixe dar un rodeo. O investimento previsto é de 333.000 euros. Cando se adxudique o contrato, o prazo de execución dos traballos será de oito meses.
- Renovación integral da iluminación na praza de Pontevedra, con 450.000€ de investimento.
- Aprobáronse 440.000€ para contratación das escavacións arqueolóxicas previstas na planta baixa da Casa da Sinagoga, na Cidade Vella.
Concurso das ESCOLAS INFANTÍS
Lage destacou, ademais, a aprobación da saída a concurso da xestión das escolas infantís municipais, cun investimento de máis de 3,5 millóns de euros no próximo curso.
Así mesmo, validouse o contrato do servizo de comidas a domicilio, “cun investimento de 1,4 millóns de euros ata o ano 2028” e con “case medio milleiro de coruñesas e coruñesas subscritos a este programa municipal”.
Máis novas
Piden transparencia ante o importante achádego arqueolóxico das obras da urbanización de Visma
As 10 promocións urbanísticas formuladas na Coruña prevén a construción de 18.000 novas vivendas
