A sección segunda da Audiencia Provincial da Coruña acollerá os días 16, 17 e 18 de xuño o xuízo contra catro homes por, presuntamente, golpear e apuñalar a outro na rúa do Orzán, na cidade herculina.

No seu escrito de cualificación, a Fiscalía sostén que na madrugada do 19 de abril de 2024 os catro procesados abalanzáronse sobre a vítima e “propináronlle varias patadas na cabeza, nas costas e no peito, así como puñadas, mentres se atopaba tirado no chan, sen ningunha posibilidade de oporse á agresión”. No curso do ataque, un deles, “coa intención de acabar coa vida” do home, cravoulle en doce ocasións unha navalla automática. Cando se sacou a arma branca, os demais procesados cesaron a agresión e apartáronse, sendo detidos pouco despois pola policía.

O Ministerio Público cualifica os feitos como un delito de asasinato en grao de tentativa, un delito de tenencia de arma prohibida, un delito de lesións agravadas e outro de resistencia, este último pola oposición que puxo un dos acusados no momento de ser arrestado. Dos dous primeiros delitos, considera autor ao procesado que cravou a navalla, mentres que aos outros tres atribúelles o delito de lesións e a un deles tamén o de resistencia. Ademais, a acusación aplica para tres dos homes a agravante de aleivosía.

Polas devanditas cualificacións, para o principal acusado a Fiscalía reclama unha pena de sete anos e seis meses de prisión polo asasinato en grao de tentativa, así como dous anos de cárcere por tenencia de arma prohibida. Polo delito de lesións imputado aos outros tres homes, o Ministerio Público expón unha condena de catro anos e seis meses de cárcere para cada un, sumándolle a un deles outros seis meses de prisión polo delito de resistencia á autoridade. Todo o proceso inclúe tamén a reclamación do correspondente abono de indemnizacións económicas para a vítima polas secuelas e danos sufridos.