Este mércores 17 de xuño ás 19:00 horas terá lugar no Centro Cívico da Cidade Vella da Coruña a presentación de “Allwomen”, unha campaña de concienciación contra o acoso machista en contornas dixitais creada por Leticia Vázquez (@vazquezleeti), influencer especializada en dereitos humanos e publicista.
A campaña ten como obxectivo denunciar aos agresores e mostrar que todas as mulleres sofren violencia machista en liña, incidindo na necesidade de educación e castigo para erradicar este tipo de comportamentos. “A violencia comeza con comentarios e ameazas, pero continúa con malos tratos psicolóxicos e físicos, culminando en violacións e asasinatos. Polo tanto, hai que detela a tempo”, sinala a promotora.
Nun contexto no que o espazo dixital se converteu nun novo escenario para a violencia de xénero, “Allwomen” busca concienciar socialmente e esixir accións urxentes ás autoridades. O evento contará coa presenza das relatoras Jimena Cardona (socióloga especializada en xénero), Patri Otero (xornalista e influencer), Noemi Alvarado (traballadora social), Paula Alonso (mediadora cultural) e Irene Tomé, responsable do programa “Abriendo Hilo” de Ecos do Sur, que ofrecerán diversas perspectivas sobre o impacto do acoso machista en liña na vida e a saúde mental das mulleres.
O programa incluirá a presentación e contextualización da campaña “Todas as mulleres”, seguida dunha mesa redonda sobre a violencia machista en liña, abordando as súas formas, consecuencias e mecanismos de resposta. Posteriormente, celebrarase un debate participativo co público para fomentar un diálogo aberto e construtivo.
View this post on Instagram
