As dúas primeiras xornadas de folga no comercio de alimentación da Coruña deixan “tendas e almacéns en mínimos”, segundo a CIG-Servizos, que prevé un seguimento “maioritario” no paro deste martes, cando tamén haberá manifestacións na Coruña, Santiago, Ferrol e Ribeira. O domingo, cando a folga afectou a tendas que teñen ese día de apertura, houbo “un importante seguimento e supermercados como Gadis de Melide non puideron abrir por falta de persoal”, destaca a central nacionalista.
O paro deste luns está centrado en loxística e rexistra, segundo a CIG, un seguimento “similar” ao da folga do 29 de maio, co almacén de Piadela “baixo mínimos” e a plataforma de distribución de peixe de Gadis “completamente paralizada”. En canto ás tendas, o seguimento nesta xornada está a resultar “mesmo maior do previsto” polo que a central espera que este martes 23 a folga sexa “un rotundo éxito de participación”.
Ao seu xuízo, evidencia o rexeitamento “unánime” dos traballadores ao bloqueo en que Gadis e Froiz manteñen a negociaciación colectiva e ás propostas “de miseria que non garanten o mantemento da capacidade adquisitiva, non melloran as condicións laborais nin permiten avanzar nos dereitos sociais”. Iso, “a pesar de que nos últimos anos as empresas están a bater marcas de facturación e obtendo beneficios millonarios”, critica. Ademais, a CIG denuncia “prácticas de esquirolaje” de Gadis e Froiz con chamamentos para realizar horas extra os días dos paros, trasladar persoal doutras provincias, cambiar as rutas de distribución, adiantar os pedidos das tendas, entre outras.
PATRONAL
Pola súa banda, a Asociación de Supermercados, Autoservizos Almacenistas e Distribuidores de Alimentación da Coruña lamenta, a través doutro comunicado, que as organizacións sindicais rexeitasen “novamente” a proposta de acudir a un procedemento de mediación ante o Consello Galego de Relacións Laborais e manteñan as medidas de conflito anunciadas.
Tras oito reunións entre as partes, a patronal asegura que continúa defendendo “a necesidade de buscar un acordo posible”. A proposta desta asociación, segundo afirma, contempla incrementos salariais “acumulados próximos ao 10% no próximos catro anos”, mecanismos de protección fronte a desviacións do IPC durante toda a vixencia do convenio, novas medidas de conciliación en materia de licenzas retribuídas, lactación, horarios e fins de semana “de calidade”, así como outras “melloras sociais e organizativas”.
A asociación subliña que as afectadas por esta negociación son “numerosas empresas galegas do sector”, entre elas pequenos comerciantes locais e o tres principais galegas de distribución alimentaria: Gadisa, Froiz e Cuevas. En conxunto, segundo as súas cifras, xeran ao redor de 16.000 postos de traballo na comunidade e manteñen “unha estreita colaboración” con centos de produtores, cooperativas, industrias agroalimentarias e provedores galegos.
“A mellora de salarios e condicións laborais é un obxectivo compartido. A cuestión é como facelo sen pór en risco irremediablemente o emprego e o futuro de empresas de aquí”, incide. Engade que “resulta difícil de entender que, nunha negociación, e tras oito reunións, unha parte rexeite catro veces a proposta de mediación á vez que esixe á outra que asuma incrementos duns 47% superiores ao resto dos seus competidores”. Así, reitera a súa “vontade de diálogo” para tentar alcanzar “un acordo razoable, equilibrado e sustentable para todas as partes”.
