Nestes tempos convulsos nos que parece que ser revolucionario é ser de extrema dereita, conseguir que a mocidade coñeza de verdade o que pasou nos tempos do franquismo convírtese nun desafío real para toda a sociedade. E nada se aprende mellor que investigando. Esas son as chaves do proxecto “Creación de Audios pola Memoria das Mulleres”, impulsado por Agareso co financiamento do Ministerio de Política Territorial e Memoria democrática.
A IES Salvador de Madariaga de A Coruña foi un dos centros participantes no proxecto da ONG, que converte ao alumnado de 1º e 2º da ESO en investigadores do seu propio pasado. A través deste programa achegáronse aos principais fitos históricos da Guerra Civil e a Ditadura e tamén gravaron e documentaron as vivencias de homes e mulleres que foron testemuñas directas ou indirectas desa época.
O proxecto centrouse especialmente na vida diaria das mulleres durante a ditadura franquista, algo sobre o que o alumnado preguntou ás súas avoas, avós, veciños e veciñas… estas vivencias exténdense a toda a provincia.
O alumnado herculino realizou máis de 40 entrevistas a avós e avoas de diferentes localidades, con diferentes oficios e perspectivas. As Mª Pilar Fernández, Fernando, MªTeresa Bouza, Julia Iglesias, María Miles , MªDolores Gómez , Félix Calvo, Silvia, María Juana Caamaño, o avó de Teo, José e Concepción Armada, falan de cómo era a vida diaria nesa época (falta de alimentos, a escola, a vestimenta…), como se escondían aquelas persoas perseguidas polo réxime ou que labores estaban reservados para as mulleres. Tamén contan historias familiares ou documentan a prohibición de falar galego en moitos ámbitos.
Toda a aprendizaxe e entrevistas realizadas están recollidas nun podcast que se pode escoitar na canle de iVoox de Agareso. Ademais deste centro participaron tamén o IES A Rodeira, en Cangas e o IES Eduardo Pondal, en Ponteceso.
O obxectivo concreto do proxecto é “paliar a falta de información acerca de esta época histórica e tamén ensanchar a documentación existente en materia de memoria democrática, especialmente aquela que ten que ver coa historia das mulleres por ser esta a máis descoñecida”, explica a xornalista Verónica Couto, de Agareso. “Preténdese que o coñecemento sobre o pasado axude a educar sobre o presente e o futuro e ademais teza lazos entre diferentes xeracións”.
