A Fundación Marta Ortega Pérez (MOP) anunciou que a súa próxima exposición, co título ‘The Hamster Becomes The Problem’, estará dedicada á obra do fotógrafo británico David Sims, que poderá verse no Peirao de Batería da Coruña desde o próximo 21 de novembro ata o 1 de maio.
Nun comunicado, a fundación resalta que a produción fotográfica de Sims supuxo “unha reinvención constante da linguaxe visual da moda”.
Nacido en Sheffield en 1966, ao longo da súa traxectoria David Sims interpreta con sensibilidade os cambios na cultura contemporánea e “desafía unha e outra vez as convencións da fotografía de moda”.
Sims expuxo en todo o mundo e a súa obra está presente nas coleccións dos grandes museos, como a Vitoria and Albert Museum, o LACMA ou a Tate.
‘The Hamster Becomes The Problem’ proporá ao visitante unha sucesión de espazos interconectados, cada un dos cales reflectirá un aspecto esencial no universo visual de Sims ao longo dos seus 35 anos de traxectoria.
“David Sims entendeu sempre que a fotografía vai moito máis alá das imaxes por si soas. Ao longo da súa carreira, as súas imaxes lograron conectar persoas, actitudes e movementos culturais que definiron a sucesivas xeracións, dando lugar a unha obra que é, aínda hoxe, tan influente como cando apareceu por primeira vez”, afirma a fundadora e presidenta da Fundación MOP, Marta Ortega Pérez.
