Como fixo esta semana xa o concelleiro de Educación, o Concello volve poñer no tellado da Xunta a lamentable situación de moitos centros de ensino da cidade. Desta volta, a alcaldesa da Coruña, Inés Rey, instou ao Executivo galego a elaborar un “plan de investimento serio e concreto” para os centros escolares da cidade ante “cada vez máis necesidades” dos mesmos.
“As carencias estruturais son competencia da Xunta”, recalcou para esixir que “invista nos centros educativos” da urbe herculina.
Neste sentido, explicou que o goberno local facilitoulle ao autonómico un “estudo con carencias e necesidades” e solicitou “ata en catro ocasiones” unha reunión cos responsables neste ámbito. “Non temos resposta”, denunciou.
“Non pode ser que anuncie actuacións en máis de 360 centros escolares de Galicia para este verán e ningún estea na cidade da Coruña”, criticou.
Así mesmo, a rexedora detallou que o municipio ten “programada a execución de 1,7 millóns en investimentos nos colexios e 2,7 en mantemento para 2026”. “Non é suficiente o que inviste o Concello fronte ás necesidades que teñen os centros”, asegurou.
Así o manifestou tras asinar un convenio de colaboración coa Federación de Anpas. O mesmo inclúe un investimento de 450.000 euros nunha “ampla oferta de actividades”; entre outras, deportivas, culturais e de idiomas. O obxectivo é, segundo recalcou, “mellorar e defender unha educación de calidade para a cidade” e contribuír a “axudar ás familias na conciliación”.
Máis novas
O Concello pon na Xunta a responsabilidade do deterioro dos centros de ensino
