A alcaldesa da Coruña, Inés Rey, presentou este mércores unha nova edición da Romaría de Santa Margarita, no marco das Festas de María Pita, que se celebrará os días 28, 29 e 30 de agosto cun amplo programa de concertos, talleres, actividades participativas e encontros ao redor da cultura tradicional galega.

No acto estivo acompañada polo concelleiro de Cultura e Turismo, Gonzalo Castro, e representantes das entidades colaboradoras e artistas participantes. “Esta romaría representa moi ben a cidade que queremos seguir construíndo: unha Coruña orgullosa das súas raíces, aberta ao mundo e que entende a cultura como un espazo de encontro e convivencia”, destacou a rexedora durante a presentación.

A programación arrincará o venres 28 de agosto cun concerto especial no Planetario da Casa das Ciencias a cargo de PÄRBO, o proxecto formado por Begoña Riobó e Anxo Pintos, acompañado das creacións visuais de Montse Piñeiro. A continuación, o anfiteatro de Santa Margarita acollerá a tradicional Gran Noite do Folclore, coa participación de Son d’Aquí, Donaire, Xacarandaina e Cantigas da Terra. Por outra banda, a Empresa Municipal de Vivenda, Servizos e Actividades (EMVSA) asumirá “proximamente” a xestión da piscina interior do Club do Mar de San Amaro, tras o acordo alcanzado entre o consistorio e a entidade.