O conselleiro de Educación, Ciencia, Universidades e FP, Román Rodríguez, pide “transparencia e responsabilidade” á UDC coa súa xestión económica e pregúntase por que, co mesmo plan de financiamento, dúas universidades non teñen problemas e unha si.
Segundo explicou ante os medios de comunicación este mércores, as tres universidades galegas contan cun plan de financiamento, posto que Galicia, destacou, é unha das poucas comunidades que dispón dunha planificación plurianual “que dá certezas, seguridade e estabilidade” aos orzamentos das universidades. Un plan, apuntou, asinado polas tres universidades. “Vemos que en dous (Universidade de Santiago e de Vigo) está a funcionar razoablemente ben. Aproban presupostos en tempo e forma, fan adquisicións, están con grandes proxectos, construíndo grandes facultades… e, con todo, na outra a situación é absolutamente diferente”, relatou.
O responsable autonómico preguntouse como puideron pasar duns orzamentos que en 2023 deixaban un remanente positivo a unha rémora que, segundo unha auditoría, chegaría aos 19 millóns en 2024. “Obviamente terannos que dicir por que. E aí pedimos transparencia, moita transparencia e que se asuman as responsabilidades do que se está facendo porque quen ten a capacidade para xestionar os recursos, para aprobar orzamentos, para aprobar partidas… é a propia universidade”, declarou.
Román Rodríguez reiterou a súa esixencia de transparencia, “básica e fundamental”, para poder facer un diagnostico da situación. A isto suma críticas ao plan de axuste presentado pola UDC en 2025. “De xeito evidente ese plan parece ineficaz e parece que non está a cumprir cos obxectivos”, lamentou. Por último, fixo un chamamento á responsabilidade das entidades públicas. “É moi fácil dicir: dádeme máis. Pero eu pregúntome: por que en dous non hai problemas significativos e unha está nesta situación?”, reiterou. “Seguimos demandando transparencia e responsabilidade. Sobre todo neste momento, no que estamos a iniciar a negociación dun novo plan de financiamento”, rematou.
