O Concello da Coruña porá en marcha un amplo conxunto de medidas para incrementar a inclusión e a accesibilidade na trixésimo novena edición do Festival Noroeste Estrella Galicia.
Así o confirmou a alcaldesa da cidade herculina, Inés Rey, nunha rolda de prensa. Explicou que os concertos de Bomba Estéreo, Rusowsky, Echo & the Bunnymen, Sprints, Bala e Sedes na praia de Riazor, así como os de Dorian e Yerai Cortés na praza de María Pita, contarán con interpretación en lingua de signos.
Ademais, levaranse a cabo unha serie de melloras no seu directorio web e facilitarase material de apoio en réxime de préstamo, como mochilas vibratorias ou cascos con illamento acústico.
Estas medidas, explicou a rexedora, complétanse coas zonas reservadas para persoas con mobilidade reducida (PMR), aseos adaptados e mapas específicos que faciliten a orientación e o uso autónomo dos espazos dos concertos.
