Unha pasaxeira de 61 anos que viaxaba a bordo do cruceiro Britannia foi evacuada ao Complexo Hospitalario Universitario da Coruña (CHUAC) tras sufrir un accidente cando a embarcación navegaba a máis de 130 millas ao norte de Estaca de Bares. Arredor das 17.00 horas do sábado, o Centro Nacional de Coordinación de Salvamento (CNCS) de Madrid recibiu un aviso dun organismo homólogo francés, que alertou da necesidade de evacuar en helicóptero unha pasaxeira do cruceiro. Nese momento, o buque atopábase a unhas 175 millas ao norte de Estaca de Bares, segundo a información trasladada inicialmente.
RESCATE COORDINADO DENDE FISTERRA
O CNCS puxo os feitos en coñecemento do centro de Salvamento Marítimo de Fisterra, que se coordinou co Servizo de Gardacostas de Galicia para organizar o rescate. Un equipo deste último organismo desprazouse ata a zona a bordo do helicóptero Pesca II. Gardacostas situou finalmente o cruceiro a unhas 130 millas ao norte do cabo de Estaca de Bares.
TRASLADADA DESDE ALVEDRO AO HOSPITAL
Arredor das 19.20 horas, a tripulación do Pesca II comunicou que xa evacuara a muller xunto cun acompañante. O helicóptero trasladounos ata o aeroporto de Alvedro, onde os agardaba persoal sanitario do 061, previamente avisado por Salvamento Marítimo. Desde o aeroporto, a paciente foi evacuada ao CHUAC para recibir atención médica.
