Inaugurouse onte, na avenida de Montoto, fronte a Dársena a segunda edición da exposición “A Galicia inédita. Unha ollada diferente do fotoxornalismo galego”. Organizada conxuntamente pola Asociación Profesional de Fotoxornalistas de Galicia (APFG) e pola Asociación de Periodistas de Galicia (APG), a expo recolle 92 imaxes, acompañadas doutros tantos textos literarios e xornalísticos elaborados por profesionais da comunicación, que plasman escenas e personaxes que pululan por esa Galicia inédita que poboa o noso imaxinario.
Esta segunda edición estará na Dársena, ao carón de Porta Real, ata o próximo 20 de agosto, como relataron María Méndez González, presidenta da APG, César Quián Taboada, videpresidente da APFG, e Fernando Blanco Rajo, comisario da exposición.
Tamén estiveron presentes o deputado José Ramón Rioboo e a alcaldesa Inés Rey, dando conta da colaboración de ambas entidades.
Todos recoñeceron así o labor que desenvolven a diario os reporteiros gráficos de Galicia.
O vicepresidente da APFG quixo ademais remarcar “o carácter inédito de moitas das imaxes expostas, que son un botón de mostra dun traballo sempre urxente e, en moitas ocasións, pouco visible”.
E o comisario da “Galicia inédita”, Fernando Blanco, dedicou a súa intervención a felicitar aos seus compañeiros fotoxornalistas e á Asociación de Periodistas de Galicia por “permitirnos bater este ano unha marca, cun total de 92 fotografías e outros tantos textos, o que no caso dos reporteiros gráficos supón a participación de case todos os profesionais en activo en Galicia”.
Blanco tamén lembrou que o xérmolo desta exposición deu o pulo definitivo para a constitución da Asociación Profesional de Fotoxornalistas de Galicia, “que agora xa conta cunha ampla representación”, engadindo que a mostra supón ademais “unha reivindicación da profesionalidade no sector e un pioneiro e brillante exemplo de esforzo colectivo, aberto á ollada do conxunto da cidadanía”.
As imaxes captan todo tipo de acontecementos, lugares e personaxes, dende a vertente máis costumbrista ou rural, ata sucesos que marcaron a actualidade dos últimos tempos en Galicia, pasando por obras que reflicten aspectos relacionados cos principais sectores produtivos da comunidade, conflitos laborais, manifestacións artísticas, festivas e culturais, ou natureza e fenómenos atmosféricos e meteorolóxicos.
