InicioA CORUÑAAplican agravante por discriminación por ameazar e tocar os peitos a unha...

Aplican agravante por discriminación por ameazar e tocar os peitos a unha muller na Coruña

Publicada o

Por monchomarino

A Sección Penal do Tribunal de Instancia da Coruña, praza 3, aplicou a agravante de discriminación por orientación sexual a un condenado a un ano de cárcere e ao pagamento dunha multa de 240 euros por ameazar e tocarlles os peitos a unha muller que paseaba coa súa compañeira sentimental e uns cans polo Parque Europa.

Así o informa o Tribunal Superior de Xustiza de Galicia (TSXG) e recólleo o fallo. O maxistrado considera probado que o 23 de novembro de 2024, arredor das 20 horas, a vítima e a súa parella estaban a camiñar por ese parque na compaña duns cans cando, ao pasar preto dun grupo de tres persoas que estaban sentadas nun banco e bebendo cervexa, unha delas — o acusado — as increpou por levar alí os animais.

“Cada vez máis enfurecido con elas, e coas súas facultades diminuídas polos efectos do alcohol que estaba a inxerir, díxolles que as ía acoitelar, tanto a elas como aos seus cans”, destaca o xuíz.

No fallo, considérase acreditado que intuíu, “polo aspecto ou polo comportamento que amosaban entre si as dúas mulleres, que a orientación de ambas era homosexual, polo que, exteriorizando a aversión persoal que sentía cara a quen se identifica como tal, se achegou á primeira e agarroulle os peitos coas mans”, ao tempo que a empurraba e profería expresións homófobas.

COHERENCIA DOS TESTEMUÑOS
Na sentenza, explícase que a versión do acusado foi desvirtuada pola coherencia dos testemuños da vítima e da súa compañeira sentimental e pola falta de credibilidade do testemuño favorable ao sospeitoso.

Deste xeito, cualifica os feitos como un delito leve de ameazas, polo que lle impón o pagamento dunha multa de 240 euros, e outro de agresión sexual, polo que o condena a un ano de prisión.

O maxistrado, que aplica a atenuante de embriaguez e a agravante de cometer o delito por motivo de discriminación referido á orientación ou identidade sexual da vítima, tamén lle impón a prohibición de comunicarse e de se aproximar a menos de 300 metros da afectada durante tres anos.

A iso súmase o pagamento dunha indemnización de 3.000 euros á vítima polo dano moral causado. A sentenza non é firme, xa que cabe presentar recurso de apelación ante a Audiencia Provincial da Coruña.

 

ÚLTIMAS

(VÍDEO): Desaloxan varios colexios da Coruña tras recibiren sendas falsas ameazas de bomba

Mañá axitada en varios colexios da cidade. Os CEIP Zalaeta, CEIP Raquel Caamacho, o...

Máis dun centenar de obras preséntanse aos Premios Mestre Mateo, con entrega de galardóns en febreiro

Un total de 155 obras presentaron candidatura aos XXV Premios Mestre Mateo, cuxa gala...

A Coruña aposta por un Nadal “sustentable e responsable” nunha nova edición da Casa dos Xoguetes

O Concello da Coruña, a través da Oficina Municipal de Información ao Consumidor (OMIC),...

O coruñés Daniel Agra regresa ao India Photo Fest con catro fotografías

O artista galego Daniel Agra presenta catro fotografías da súa serie Tesseract Daydreams no...

DEIXAR UN COMENTARIO

Please enter your comment!
Please enter your name here