O Concello da Coruña publicou este mércores o bando municipal que regula as actividades na rúa de face ao próximo 12 de agosto, xornada na que esta será unha das cidades nas que poderá seguirse a eclipse solar.

A previsión dos servizos municipais é que sexa unha xornada de gran afluencia no conxunto da cidade. Por ese motivo, e co obxectivo de evitar desprazamentos innecesarios e minimizar incidencias de mobilidade, o Concello recomenda o seguimento da eclipse desde puntos de proximidade existentes no dez distritos da cidade.

O mapa de puntos de visión confirmados nos barrios xa está habilitado na web do consistorio. Con todo, e como medida preventiva, o goberno local previu un dispositivo especial de transporte.

Haberá cortes de tráfico en puntos como o paseo marítimo — as praias de Riazor e Orzán serán dúas zonas de observación prioritaria –; a estrada do Portiño e o acceso ao monte de San Pedro, tamén na contorna do estadio municipal de Riazor, onde ese día, á tarde-noite, terá lugar o Trofeo Teresa Herrera.

Co obxectivo de fomentar os desprazamentos en transporte público compartido, deseñouse un dispositivo especial con lanzadeiras que conectarán os campus da UDC na Zapateira e Elviña, onde haberá aparcadoiros disuasorios, coa praza de Pontevedra. Tamén haberá reforzo de liñas.