Os servizos de emerxencias rescataron e evacuaron en helicóptero medicalizado unha muller de 85 anos que foi sacada da auga en parada respiratoria na praia de Mera, en Oleiros. Os feitos tiveron lugar pasadas as 17.00 horas, cando o 112 Galicia recibiu varias chamadas de persoas que alertaban de que os socorristas estaban a tentar reanimar unha muller que fora retirada da auga inconsciente. Ata a zona desprazáronse efectivos da Policía Local, así como persoal do 061-Galicia a bordo dun helicóptero medicalizado. Tras ser atendida no lugar, a bañista foi trasladada a un centro hospitalario.

OUTRO RESCATE NA RAPADOIRA

Practicamente á mesma hora, os socorristas rescataron tamén da auga unha persoa inconsciente na praia da Rapadoira, en Foz (Lugo). Ata este areal desprazouse persoal sanitario do 061, que se fixo cargo da asistencia e posterior traslado da vítima.