A Deputación da Coruña publica este martes no Boletín Oficial da Provincia (BOP) a concesión definitiva de 610.055 euros en subvencións a 41 entidades e asociacións empresariais da provincia para financiar actividades de promoción económica durante este ano. Estas axudas, informa, permitirán desenvolver iniciativas de dinamización do comercio e da hostalaría local, promoción empresarial, emprendimieto, internacionalización, innovación, economía social e circular ou difusión de sectores estratéxicos.
O programa apoia actuacións distribuídas por todo o territorio provincial e impulsadas tanto por asociacións de comerciantes e empresarios de ámbito local como por entidades sectoriais, clústeres, cámaras de comercio e colexios profesionais.
