A Asociación Galega de Axuda a Ucraína convocou a toda a comunidade ucraína residente en Galicia e ao conxunto da sociedade galega a participar este luns, día 24, no acto conmemorativo que a entidade realizará na Coruña.

“Aínda que a celebración terá lugar na cidade herculina, a convocatoria está dirixida a persoas procedentes de toda Galicia, coa vontade de converter A Coruña nun punto de encontro para quen queiran compartir unha das datas máis significativas para o pobo ucraíno”, sinala nun comunicado.

A marcha comezará ás 19.00 horas no monumento aos Heroes do Orzán e percorrerá o paseo marítimo ata a chaira da Playa Club, onde terá lugar a lectura dun manifesto e, posteriormente, unha actuación musical.

O 24 de agosto constitúe unha das datas fundamentais da historia contemporánea de Ucraína. Ese día, en 1991, o Parlamento ucraíno aprobou a Declaración de Independencia do país. A decisión foi, posteriormente, ratificada pola cidadanía no referendo celebrado o 1 de decembro daquel mesmo ano.

“En 2026 cúmprense 35 anos daquela declaración, un aniversario que adquire unha especial dimensión no contexto actual”. “Máis de tres décadas despois, a soberanía, a integridade territorial e o dereito de Ucraína a decidir libremente o seu futuro continúan sendo cuestións de plena actualidade como consecuencia da invasión rusa e dunha guerra que segue afectando diariamente a millóns de persoas”, recalcan desde a asociación.