A Deputación da Coruña publicou ‘Quen conduce o Estado’, un ensaio centrado na vangarda gráfica e na transcendencia política do Estatuto de Galicia de 1936. A publicación enmárcase na campaña impulsada pola área provincial de Cultura para conmemorar o 90 aniversario do Estatuto, unha iniciativa que comezou coa realización e divulgación de diferentes pezas audiovisuais.

“A obra demostra que quen impulsou o Estatuto entendeu algo que continúa sendo absolutamente actual: que para construír un país non chega con ter ideas, hai que saber explicalas e conseguir que a xente as sinta tamén como propias”, destacou a deputada de Cultura, Natividade González. A publicación, titulada ‘Quen conduce o Estado: Arte, ideas, artistas e movementos que deron forma á vitoria do Estatuto de Galicia de 1936’, é obra da historiadora da arte, investigadora e escritora Iria-Friné Rivera Vázquez.

O ensaio propón unha lectura do Estatuto non só desde a súa dimensión política, senón tamén desde o papel que xogaron a comunicación, a estética e a creación artística na mobilización social arredor do proxecto estatutario. Deste xeito, a Deputación busca poñer en valor a capacidade da cultura e da gráfica política para construír imaxinarios colectivos e facer comprensibles e compartidas determinadas ideas de país, recuperando unha parte clave da historia galega no marco da conmemoración do 90 aniversario do Estatuto.