Dúas persoas resultaron feridas na tarde deste venres na Coruña despois de que unha árbore caese sobre elas mentres permanecían sentadas nun banco situado na rúa de Barcelona.

O incidente tivo lugar poucos minutos despois das 15.30 horas, segundo informou o 112 Galicia. A central de emerxencias recibiu varias chamadas de particulares que alertaban da caída da árbore e da presenza de dúas persoas afectadas.

As persoas que contactaron co servizo de emerxencias precisaron que ningunha das vítimas quedara atrapada baixo a árbore, polo que non foi necesario realizar labores de excarceración para liberalas.

Tras recibir os avisos, o 112 activou un operativo no que participaron os profesionais de Urxencias Sanitarias de Galicia-061, así como efectivos da Policía Nacional e da Policía Local da Coruña.

A central de emerxencias tamén trasladou o aviso aos bombeiros municipais, ante a presenza da árbore caída na vía pública.