Afectados estafados por un exagente de banca de Laxe aceptaron o pago dunha indeminazación por parte da entidade bancaria, nunha nova sesión do xuízo celebrado na Audiencia Provincial da Coruña, que proseguirá este mércores.

En concreto, foi cun acordo entre algúns afectados polo que se lles pagarán contías que van desde os 3.000 ata os 36.000 euros. Isto nun xuízo no que xa se concretou no mes de marzo a responsabilidade penal e no que nesta xornada avanzouse nos acordos para unha responsabilidade civil.

Nesta xornada, ratificouse un acordo con algunhas das vítimas polo que se pagará unha contía total de máis de 90.000 euros. Para este mércores, está fixada unha nova sesión para chegar a acordos sobre un posible de pago de indemnizacións, ademais da lectura de conclusións.

CONDENA DE MÁIS DE DOUS ANOS DE CÁRCERE

En concreto, o ex axente está acusado de organizar unha rede de irregularidades bancarias entre os anos 2006 e 2014 para estafar 3,7 millóns de euros. O home, nunha sesión do xuízo previa á desta xornada, aceptou dous anos e oito meses de prisión.

A responsabilidade civil fixarase nas sesións do xuízo fixadas para estes días. Isto despois de “recoñecer o procesado expresamente o contido íntegro” da petición da acusación nestes termos, segundo expuxo a representante do Ministerio Público.

Polo delito continuado de falsidade documental impónselle unha pena de 11 meses de prisión e por estafa agravada e continuada, 21 meses de cárcere. Ademais, deberá pagar senllas multas de 450 euros.

FEITOS

Segundo recolle o escrito fiscal, o acusado aproveitou o trato “personalizado e cordial” para establecer vínculos de confianza cos seus clientes, moitos deles persoas de avanzada idade con escasa cultura financeira.

Esta relación próxima permitiulle crear unha “banca paralela” allea a calquera control da entidade bancaria oficial, na que manipulaba os cadernos de aforro mecanografiando saldos ficticios, apropiábase de efectivo que non chegaba a contabilizar, retiraba diñeiro das contas falsificando firmas e subscribía seguros, préstamos e outro tipo de produtos financeiros a nome dos seus clientes.

En concreto, a contía investigada ascende a 3.715.130,64 euros, que se repartirían en 2.916.388,25 euros subtraídos de fondos de 151 clientes e outros 798.742,39 euros obtidos a través de 61 préstamos.