O pasado venres Sumar Coruña anunciaba que Trinidad Palacios era a súa proposta para liderar a candidatura conxunta dos grupos da esquerda de cara ás eleccións municipais de maio de 2027. Hoxe tocáballe a Podemos (outro dos grupos que formarán esa coalición a nivel local con Esquerda Unida e o Partido Verde-EQUO) anunciar o que será o seu candidato para liderar o asalto á alcaldía coruñesa, Aitor Neira.
A presenza da Trinidad Palacios durante a presentación dá conta da boa sintonía entre partidos, nun acto celebrado esta mañá na sede de Podemos (en Catro Camiños, na Rúa Chile, 35) que reivindicou “a unidade e a colaboración entre os diferentes espazos progresistas da cidade”.
O candidato destacou que a súa decisión nace da necesidade de “dar un paso adiante” ante un momento no que, segundo sinalou, “A Coruña está vivindo unha cidade mobilizada, con barrios, colectivos, traballadores e movementos sociais reclamando cambios”.
O candidato puxo como exemplos as mobilizacións polo dereito á vivenda, as reivindicacións veciñais en diferentes barrios da cidade, as demandas relacionadas co transporte público e as mobilizacións dos traballadores e traballadoras en defensa das súas condicións laborais.
Un proxecto “aberto e de suma”
Un dos eixos centrais da presentación foi o chamamento a construír un proxecto político aberto a persoas procedentes de diferentes espazos sociais e políticos. Neste sentido, Neira defendeu que as próximas eleccións municipais deben ser unha oportunidade para “sumar vontades” e non limitarse a unha competición entre siglas.
“Non queremos construír unha candidatura contra ninguén. Queremos construír unha candidatura a favor da Coruña, a favor dos seus barrios e da súa xente”, sinalou.
“Unha cidade non son as súas grandes obras. Unha cidade son as persoas que viven nela”, afirmou Neira, reivindicando a necesidade de recuperar unha visión da política municipal centrada na vida cotiá dos coruñeses e coruñesas.
O candidato fixo tamén un chamamento á participación cidadá no proceso de construción da candidatura.
Marea Atlántica
Despois de que os medios situasen á Marea Atlántica na mesma coalición, este mediodía o que queda do partido quixo aclarar que “a nosa formación municipalista non está a participar en conversas formais para ningunha coalición ou candidatura con outras forzas políticas de cara ás eleccións locais de 2027. As informacións aparecidas hoxe nas que se asegura a nosa concorrencia son, polo tanto, incorrectas. En todo caso, a decisión final non está tomada e queda en mans das persoas con dereito a voto na nosa Rede, o mesmo xeito de proceder que levamos aplicando desde o nacemento da Marea Atlántica”.
