O Concello da Coruña destinará máis de 100.000 euros á dinamización lectora infantil a través dun programa que levará 104 actividades a oito espazos da Rede de Bibliotecas Municipais. A iniciativa desenvolverase entre outubro e maio e contará con máis de 2.600 prazas dirixidas a crianzas de entre 3 e 7 anos e ás súas familias.

A programación buscará achegar os libros aos máis pequenos a través de diferentes formatos. As sesións incluirán contos, narración oral, representacións escénicas e música, ademais doutras propostas adaptadas ás idades, intereses e necesidades das persoas participantes.

O concelleiro de Cultura e Turismo, Gonzalo Castro, sinalou que o obxectivo é que “as nenas e os nenos descubran dende as primeiras idades que na biblioteca sempre hai unha historia agardándoos”, ao tempo que estes equipamentos funcionan como lugares nos que as familias poidan “compartir tempo, descubrir libros e gozar xuntas da lectura”.

Entre as iniciativas previstas continuará ‘Merendas con contos’, un dos programas con maior traxectoria das Bibliotecas Municipais da Coruña. A actividade leva 32 anos dirixíndose a nenos e nenas de entre tres e sete anos e ás súas familias.

A proposta combina o achegamento á literatura cun formato participativo, de maneira que as crianzas poidan familiarizarse cos libros a través do xogo e das historias, mentres os adultos comparten con elas un espazo de lecer vinculado á lectura.

O deseño das actividades terá en conta criterios de participación, diversidade e inclusión, segundo explicou o Goberno local. As propostas adaptaranse ás distintas capacidades e intereses do público infantil.

Ademais, a programación dará prioridade aos libros que xa están incorporados ao catálogo da Rede de Bibliotecas Municipais. Deste xeito, as familias que participen nas actividades poderán localizar posteriormente as obras nos propios centros e levalas en préstamo de maneira gratuíta.

ACTIVIDADES DE LUNS A SÁBADO EN OITO ESPAZOS

As sesións terán unha duración prevista de 45 minutos, entre as 18.00 e as 18.45 horas, e distribuiranse de luns a sábado por diferentes barrios da cidade.

Os luns será a quenda da Biblioteca Ágora, con capacidade para 30 persoas. Os martes haberá actividades na Biblioteca Sagrada Familia, con 20 prazas, e no Fórum Metropolitano, con 30. Os mércores desenvolveranse na Biblioteca Monte Alto, que contará con 25 prazas por sesión.

A programación continuará os xoves na Biblioteca Castrillón, con 30 prazas, e os venres na Biblioteca Rosales, onde se ofrecerán 16. Finalmente, os sábados celebraranse actividades no Punto de Préstamo de Mesoiro, con capacidade para 30 participantes, e na Biblioteca Durán Loriga, con outras 20 prazas.