A Asociación Veciñal e Cultural Oza Gaiteira Os Castros organiza dúas novas propostas culturais abertas á veciñanza que terán lugar nos próximos días no Fórum Metropolitano da Coruña.
Hoxe mesmo, xoves, 1 de outubro, ás 18:30 horas, coa inauguración da exposición fotográfica «Camiños», do colectivo Ollo de Vidro.
A exposición está organizada pola Asociación Cultural da Coruña Alexandre Bóveda, coa colaboración da Asociación Veciñal e Cultural Oza Gaiteira Os Castros. A mostra reúne o traballo de Lestonnac Ibáñez, Manolo Graña, Eduardo Castro, Raúl Castro e Carlos Silvar, e poderá visitarse no Fórum Metropolitano.
A exposición ofrece unha mirada fotográfica sobre diferentes espazos, percorridos e transformacións da contorna, convidando á cidadanía a achegarse á fotografía e á memoria do territorio.
A programación continuará o luns, 5 de outubro, ás 19:00 horas, coa proxección do documental «El último rally», dedicado á figura do piloto Carlos Piñeiro e dirixido por José Antonio Jiménez.
Esta segunda actividade está organizada pola Asociación Veciñal e Cultural Oza Gaiteira Os Castros e contará coa proxección no Fórum Metropolitano, con entrada de balde ata completar aforo.
