Decenas de persoas asistiron na praza de María Pita ao minuto de silencio convocado polo goberno local ás portas do Concello da Coruña en lembranza de Maricarmen Abascal, a octoxenaria desafiuzada da vivenda na que residira durante 71 anos e falecida nas últimas horas. No acto participou a alcaldesa herculina, Inés Rey, xunto con outros compañeiros socialistas e representantes do BNG, aínda que non acudiron edís do PP.

“Esta muller converteuse nun símbolo polos dereitos”, destacou a rexedora en declaracións previas aos medios de comunicación. “Foi expulsada da súa casa e non puido cumprir o seu último soño, morrer na vivenda na que medrou”, criticou. “Esperamos que agora descanse e que a loita continúe para defender os nosos dereitos”, engadiu tras o seu falecemento.

Sobre o minuto de silencio convocado, Inés Rey explicou que o obxectivo era que a cidadanía “se una a esta homenaxe a Maricarmen e ás persoas que sofren desafiuzamentos ou situacións complicadas” por mor de quen, segundo sinalou, entende que “a vivenda é para especular”.