As protestas convocadas na tarde deste mércores na Coruña en contra da “represión policial” durante os disturbios rexistrados este mediodía en protesta por un acto do líder de Vox, Santiago Abascal, concluíron tamén con altercados entre un grupo dunhas ducias de persoas e axentes policiais, que volveron cargar contra algúns manifestantes.
Cando xa a maioría das ao redor de 2.000 persoas que apoiaron as protestas marchouse tras unha manifestación pacífica polos cantóns, sobre as 21.15 horas, só continuaban na zona do Teatro Colón, algo máis dun centenar de manifestantes. A Policía, a raíz do lanzamento dunhas bengalas por parte dun pequeno grupo de radicais encapuchados, empezou a cargar e a disolver usando porras, entre o lanzamento de petardos e insultos contra as actuacións policiais.
O grupo de manifestantes empezou entón a correr e algúns dos que conseguiron librarse de ser inmobilizados no chan tombaron colectores e queimaron algún. Ademais, utilizaron valos de obra que había na zona do Obelisco para facer unha especie de barricada, que obstaculizaba o paso dos vehículos policiais.
Despois de minutos de altercados, entre as 21.15 e pasadas as 21.30 horas, período no cal algunhas testemuñas observaron o lanzamento de pedras ás forzas da orde, a zona permanecía cun amplo despregamento policial, integrado por polo menos nove furgóns.
A persecución trasladouse a outras zonas da cidade, e o grupo radical foi escapando da Policía, deixando un regueiro de colectores en chamas, polas rúas San Andrés, Juan Flórez, Sinfónica de Galicia e mesmo a Ronda de Nelle.
Unha actuación dun pequeno grupo que non debería empañar a manifestación pacífica protagonizada polos colectivos de esquerdas anfifascistas.
Máis novas
(VÍDEO): A Coruña antifascista saíu á rúa contra a represión policial
