O Ministerio de Transportes, Mobilidade e Axenda Urbana licitou o contrato de obras de remodelación da Avenida de Alfonso Molina, na Coruña, por un orzamento de 21 millóns de euros.
A actuación, de alto impacto para a cidade da Coruña e a súa área metropolitana, ten como principal obxectivo a mellora da funcionalidade, a capacidade e a seguridade viaria desta avenida. Para iso, minimizaranse os importantes movementos de trenzado existentes, que se xeran especialmente en horas punta entre os nós da AP-9, Matogrande-Pocomaco e Ponte da Pedra-San Cristóbal.
Estes trenzados, apunta o Goberno central, “causan problemas de seguridade viaria que dan lugar a retencións, conxestión, ruído e contaminación, cunha afectación global aos accesos á cidade e finalmente á mobilidade de toda a área metropolitana”.
Para lograr este obxectivo, foron proxectadas novas vías de servizo laterais en ambos os sentidos de circulación que permiten reordenar os accesos existentes, polo que será necesario repor as dúas pasarelas peonís afectadas que cruzan a avenida. Por último, completarase o movemento da ligazón de Ponte da Pedra cara á AC-10 (porto) e barrio de Matogrande desde o centro da cidade.
Por outra banda, o ministerio xa está a ultimar os pasos para finalizar e aprobar o outro proxecto previsto para esta mesma avenida: o de integración ambiental. Esta actuación, financiada polo Plan de Recuperación, incorpora diversos aspectos que melloran a integración urbana da actuación e achegan seguridade viaria aos usuarios vulnerables (peóns, ciclistas e mobilidade alternativa).
Algúns elementos proxectados son novas sendas, vías ciclables, plantacións e pantallas vexetais, unha nova pasarela peonil sobre o viario Matogrande-Pocomaco, que facilitará o acceso cara á universidade, e novos viarios que posibilitan a realización de novos movementos e accesos.
Pola súa banda, seguen en execución as obras de construción da pasarela peonil entre os barrios de Pedralonga e Palavea, sobre a propia AC-11. Estas obras, do mesmo xeito que a intervención de integración ambiental, tamén corren a cargo do Plan de Recuperación, Transformación e Resiliencia.
