O Ministro de Cultura e Deporte, Miquel Iceta, elevará mañá ao Consello de Ministros o nomeamento de Manuel Segade como novo director do Museo Nacional Centro de Arte Reina Sofía, segundo informou o ministerio.
Manuel Segade (A Coruña, 1977), actualmente director do Museo Centro de Arte Dous de Maio (Móstoles), dependente da Comunidade de Madrid, foi o candidato que obtivo maior puntuación e será a proposta do ministro Iceta mañá no Consello de Ministros para ocupar o posto de director do Museo Reina Sofía.
Segade é licenciado en Historia da arte pola Universidade de Santiago de Compostela. Exerceu como coordinador de programación do espazo Metrònom da Fundación Rafael Tous d’Art Contemporani de Barcelona e como Comisario xefe do Centro Galego de Arte Contemporánea (Santiago de Compostela). Ademais, comisariou durante dúas décadas (2003- 2023) numerosas exposicións en institucións nacionais e internacionais.
