Diante das que entenden como “provocacións protagonizadas os últimos días por parte dun grupo ultra que está a contratar valados publicitarios para deturpar os nomes oficiais de varias localidades galegas“, A Mesa pola Normalización Lingüística vén de convocar á cidadanía a concentrarse este venres, día 30 de xuño, ás 12h, no Obelisco da Coruña para defender a toponimia oficial das nosas cidades e vilas.
A cidadanía respondeu masiva e inmediatamente a través das redes sociais, obrigando mesmo a retirar algúns dos valados, pero a entidade de defensa da lingua considera necesario “amosar tamén nas rúas a oposición frontal ás agresións galegófobas e defender, unha vez máis, a Lei de Normalización Lingüística, que no seu artigo 10 establece que a única forma oficial dos topónimos é a galega”.
A Mesa recorda que “os poderes públicos deben actuar en defensa da lei e contra o uso reiterado e sistemático das formas deturpadas tanto nesta campaña publicitaria como na sinaléctica, nos medios de comunicación ou mesmo mapas dixitais como os de Google”. “Atacar e ocultar a nosa toponimia é facelo tamén coa nosa dignidade colectiva e a capacidade de dicirlle ao mundo quen somos e onde estamos”, defende un manifesto promovido na rede pola entidade de defensa da lingua.
Por iso, piden tanto á Xunta de Galiza como ao Goberno español e aos concellos tomen “todas as accións necesarias para garantir o cumprimento da legalidade na toponimia, instar as compañías de xeolocalización a que empreguen as formas correctas e oficiais dos nomes de lugar e manifestarse contra as campañas de odio á lingua galega e á denominación do seu territorio”.
Novas relacionadas
Hablamos Español traslada a polémica de “Sangenjo” a “La Coruña” cun novo valado
