Un home tivo que ser trasladado ao Complexo Hospitalario da Coruña ao sufrir queimaduras cando trataba de sufocar un incendio dun alpendre en Oleiros. Segundo informou o 112, esta persoa viuse afectada na cara e no pelo, mentres que o alpendre ardeu por completo xunto coas pertenzas que se gardaban no interior, entre elas, unha cociña.
Cando os efectivos de emerxencias chegaron ao lugar dos feitos, os propietarios tiñan o lume practicamente sufocado. Desta maneira, procederon a remover e apartar o cascallo co fin de asegurar o completo apagado do incendio.
Con todo, debido ás consecuencias do lume, o ferido foi evacuado nunha ambulancia de Urxencias Sanitarias de Galicia-061 ao Complexo Hospitalario Univesitario da Coruña (Chuac) para recibir tratamento polas lesións causadas.
Segundo a información recollida no 112 Galicia, os feitos comezaron ás 10,00 horas coa chamada de alerta dunha persoa particular que inicialmente pensaba que se estaba producindo un lume forestal. Con todo, o aviso á Policía Local de Oleiros serviu para descartar esta posibilidade e centrarse nun incendio urbano que comprometía un alpendre na Rúa Fermín Bouza Brey.
Para facer fronte ás chamas, desde o 112 Galicia pediuse a colaboración dos membros do servizo municipal de emerxencias, así como dos Bombeiros de Arteixo.
