O conselleiro de Facenda e Administración Pública, Miguel Corgos, defendeu este sábado o papel da Xunta no proceso de consecución da Axencia Española de Supervisión da Intelixencia Artificial (Aesia) para A Coruña.
Así mesmo, tachou de “desafortunadas” as declaracións da alcaldesa da cidade, Inés Rey, nas que pedía a Alfonso Rueda que defenda a elección da Coruña despois de que o Tribunal Supremo (TS) activase o trámite para analizar a suspensión cautelar da concesión solicitada polo Concello de Granada.
Este sábado, en declaracións aos medios no recinto feiral de Silleda, onde acudiu para facer seguimento das oposicións da Xunta que aí se celebran, Corgos dixo non saber “cal é o obxectivo” destas declaracións, xa que, na súa opinión, “no proceso de consecución da Aesia” foron “da man todas as administracións”.
“Nós fixemos os deberes porque eliximos a candidatura que tiña as mellores posibilidades en base a un informe que valoraba máis de 200 variables das que se recollían na orde do Ministerio”, defendeu.
Agora, lamentou que “todo cambia” á vista de “os recursos presentados polo alcalde socialista de Granada hai uns meses”, aínda que tras os comicios municipais do 28 de maio a cidade andaluza está gobernada polos populares.
Para Corgos, a responsabilidade é “do Goberno e do grupo que soporta ao Goberno”. “Que agora se lle pidan responsabilidades ao presidente da Xunta e á Xunta, que fixeron o seu traballo, resulta polo menos sorprendente”, resolveu. Con todo, o conselleiro de Facenda pediu “quitarlle importancia” ás declaracións da rexedora coruñesa que enmarca en “un proceso de nerviosismo preelectoral”.
