Os propietarios dos terreos das Fragas do Eume convocaron unha manifestación para o día 13 ante a Xunta co obxectivo de reclamar “compensacións xustas” pola “expropiación encuberta” dos seus terreos, en virtude do plan de xestión deste territorio.
A decisión adoptouse nunha reunión este sábado na Capela por parte da Asociación de propietarios de terreos das Fragas do Eume, que agrupa a 450 propietarios, con representantes dos municipios da Capela, As Pontes, Pontedeume e Monfero (non houbo representante do de Cabanas) para abordar as consecuencias do Plan Reitor (PRUX) da Xunta.
A xuízo da entidade, non ofrece “compensacións xustas” para os propietarios dos terreos, que durante décadas preservaron e contribuíron a manter o parque como está na actualidade.
Na reunión participaron, entre outros, o alcalde das Pontes, Valentín González Formoso; o de Pontedeume, Bernardo Fernández; e o da Capela, Manuel Meizoso (todos eles do PSOE), que mostraron o seu apoio ás reivindicacións do colectivo, que entende que o PRUX supón “unha expropiación encuberta” dos seus terreos, ao non ofrecer compensacións pola limitación de usos que terán os terreos da súa propiedade.
MANIFESTACIÓN O XOVES 13
Os propietarios dos terreos manifestaranse o vindeiro xoves, 13 de xullo, en Santiago de Compostela ante a Consellería de Medio Ambiente da Xunta de Galicia para amosar a “unanimidade” das reclamacións dos veciños e reclamar á administración autonómica que estableza “un sistema de compensacións negociado cos propietarios“, tal e como se fixo en casos similares en Asturias ou Castela e León.
Outro dos temas abordados na reunión foi a aprobación, por parte da Xunta, da Fundación Fragas do Eume, impulsada desde a empresa Ecoener, que conta no seu Consello de Administración “con membros destacados” do Partido Popular como os exministros Eduardo Serra e Ana Palacio e presidida por Luís de Valdivia, e que, segundo se expresou na reunión, “podería ter entre os seus labores a adquisición de terreos”.
Así, advirten de que “contrasta a rapidez coa que a Xunta outorgou o seu beneplácito á creación desta fundación coa ausencia de compensacións aos propietarios nunha PRUX que tardou dúas décadas en materializarse”.
