Ideada por Chus Castro unha serie de profesionais do xornalismo veñen de emabrcarse nunha fermosa travesía. A compañeira xubilada da Radio Galega, vén de transmitir o seu entusiasmo arredor do proxecto Solidarios cos maiores a nomes coñecidos da televisión como Amalia Baltar, Bea Soler, Sabela Romar, Lucía Aller e Manolo Rodríguez, todos vinculados á cidade da Coruña.

A idea é crear contidos interesantes para os nosos maiores, visibilizar os seus problemas para aportar o seu grao de area á fenda dixital e invitalos a navegar pola rede con contidos de alcance. “Trátase de facer algo por unha banda da sociedade cada vez máis vulnerable, como son os maiores”, explica Castro, ofrecendo cifras importantes: Galicia conta con máis de 700.000 maiores de 65 anos, un 26,1% da poboación, e só na cidade da Coruña hai 32.000 persoas maiores que viven soas.

Coa axuda de Marcus Fernández na produción, o proxecto avanza pouco a pouco gracias á vontade e solidariedade destes profesionais, que en clave ONG se deixan arrastrar polo entusiamo de Casto para ofrecer pezas como esta sobre o abandono do alcol, sobre o testamento…

Poden ollar máis contidos en solidarioscosmaiores.org, na canle de Youtube ou nas redes sociais