O tráfico de pasaxeiros de cruceiros creceu nos portos galegos, coa Coruña á cabeza, segundo datos achegados por Portos do Estado.

Ata xullo, a nivel estatal, os cruceristas creceron un 74,8% e sumaron 6,1 millóns de visitantes no primeiros sete meses, superando as cifras marca de 2019, cun incremento do 7,6% respecto dese período nese ano, cando se alcanzaron os 5,6 millóns de cruceristas.

No caso da Coruña, rexistráronse 151.351, un 63,5 por cento máis; no de Ferrol, 4.094, cun 5,6% máis; en Vigo, 89.258, un 35% máis e en Vilagarcía, 1.274, un 200 por cento máis.

En canto ás mercadorías, a nivel estatal, mantense a dinámica do anterior mes, tras alcanzar 320,1 millóns de toneladas no acumulado ata xullo, o que supón un decrecimiento do 4%, respecto ao mesmo período do ano anterior.

No que se refire ao porto da Coruña, tivo un aumento do 5%, con case oito millóns de toneladas, mentres que no de Vigo foi dun 2,5%, con case tres millóns de toneladas e no de Ferrol, con cinco millóns de toneladas, descendeu un 22 por cento. En Vilagarcía, con 900.000 toneladas, rexistrou unha diminución do 2,5 por cento.