Colectivos feministas convocaron para este venres 1 de setembro manifestacións por diversos puntos da xeografía española, entre eles A Coruña, nunha concentración ás 19,00 horas no Obelisco, contra o presidente suspendido da Real Federación Española de Fútbol, Luís Rubiales, polo bico na boca á xogadora Jenni Fermoso na final do Mundial, para “sacarlle cartón vermello ante o machismo e ante o abuso”.
Unha cita convocada polo colectivo ‘Libres e Combativas’, a plataforma feminista impulsada polo Sindicato de Estudantes e Esquerda Revolucionaria. “Xa abonda de vendernos a moto. O que teñen que facer é destituír a este personaxe e a toda a cúpula que lle aplaude”, aseguraba en declaracións a Europa Press a portavoz do grupo, Mariña Mata.
Igualmente, Mata indicaba que esta convocatoria é unha “continuación” á que tivo lugar o pasado luns na capital. “O do outro día foi a mostra da simpatía, da rabia e tamén da necesidade de defendernos, que é a única maneira que temos para facelo”, engadiu.
