Reindicativas as Festas deste mes de outubro de Monte Alto. Esa especie de praza inventada na parada de buses da Rúa da Torre volvía acoller un amplo escenario para celebrar unha completa fin de semana. Xa arrincaba a troula na sesión vermú sabatina co pasarrúas en clave de swing dOs Bregadiers e coa combativa The Tetas Van.
Abría a noite de concertos Fran Amil (que viviu na mesma praza) e banda AMILicia, con temas dos Diplomáticos, cantándolle aos “ghaiteiros” do país, rescantando temas míticos como “Monte Alto de Rachi”. Un Amil comprometido, cantando a Manuel María en clave de reagge e de R&R e mesmo atrevéndose cunha versión funki do Negra Sombra de Rosalía.
A banda deu paso ao “honesto” pregón de Marta Otero (xornalista de La Opinión) e Antón Losada (da Cadena Ser) como membros da Revista Luzes. Un pregón que defendeu que “as cidades son os barrios, os nenos nos parques”, e que “a cidade é para vivir nela non para facer negocio”.
Pregoeiras en apuros @antonlosada https://t.co/7Eu2Se5WVG pic.twitter.com/JPVxhtqWq3
— Marta Otero Mayán (@OteroTuitea) September 30, 2023
De contado comezaba o espectáculo audiovisual de Baiuca. Quedou pequena a “praciña” para o concertazo dun dos grandes abandeirados da evolución electrónica da música galega tradicional. O proxecto de Alejandro Guillán, con Xosé Lois Romero ás percusións, deixou unha pegada fantástica no barrio. As cantigas tradicionais, as desgarrradoras voces e os ritmos frenéticos das pandeiretas das Lilainas maridaron á perfección coas bases electrónicas tan caracteristicas. Mención aparte o apartado visual, cun coidado das imaxes fantástico.
Quedou pequena a “praza” da rúa da Torre das Festas de #MonteAlto para o concertón de @baiucamusic!!! pic.twitter.com/eRaPCpFNWs
— Xornal da Coruña (@xornaldacoruna) September 30, 2023
