O tenente de alcaldesa e concelleira de Área de Economía e Planificación Urbana da Coruña, José Manuel Lage Tuñas, reprochou á vicepresidenta segunda e responsable de Vivenda da Xunta, Anxos Vázquez, que sinale que a lei de vivenda estatal é “de dubidosa aplicación porque hai un recurso ante o Tribunal Constitucional”, despois de que o consistorio municipal coruñés solicitase a declaración da cidade como zona de mercado residencial tensionado polos elevados prezos do aluguer.
“Non se se é ignorancia, que quero pensar que non, ou é mala fe, pero escoitar por segundo día consecutivo esta semana á vicepresidenta da Xunta dicir que é de dubidosa aplicación unha lei porque haxa un recurso ante o Tribunal Constitucional, miúda barbaridade“, proclamou Lage Tuñas.
Nesta liña, asegurou que se poderían pór “moitos exemplos” de leis que foron aprobadas en España e están pendentes de que se pronuncie o Tribunal Constitucional “e non por iso deixaron de aplicarse nin desenvolverse”.
Así se manifestou o concelleiro coruñés despois de que este sábado a vicepresidenta segunda insistise en esperar a coñecer se a lei estatal de vivenda “é constitucional ou non”, ademais de reivindicar a necesidade de contar con “estudos previos” para declarar zonas tensionadas.
Para Lage Tuñas, “escoitar declaracións deste tipo” por parte de representantes da Xunta “dá proba de en que punto está o Goberno galego”.
PREZOS ALUGUER
Doutra banda, mostrou a súa “sorpresa” porque quen é responsable de competencias de vivenda en Galicia “cuestione os prezos do aluguer na Coruña”. “Non se se o mercado está tensionado ou non, pero os prezos do aluguer están polas nubes e quen están tensionados son os cidadáns que cada vez lles custa máis acceder a unha vivenda”, manifestou.
Ante isto, lembrou que “quen ten as competencias en materia de vivenda pública” en Galicia “é a Xunta”, así como que “dos exiguos orzamentos” que dedica a esta materia “executaron 4,5 dos 52 millóns de euros en 2022”.
“Creo que ese é un retrato perfecto do que fai o PP coas competencias de vivenda en Galicia: non lle ocupa nin lle preocupa”, aseverou. Nesta liña, volveu a sinalar que o feito de que a conselleira competente nesta materia “cuestione os prezos do aluguer” na cidade herculina “demostra que viven nunha realidade paralela”.
Ademais, asegurou que a Xunta “no canto de parecer unha administración pública, parece unha axencia de publicidade” ou, na súa falta, engadiu, “tertulianos facendo comentarios” sobre o que se fai desde outras administracións.
