A Autoridade Portuaria da Coruña licitou as obras da rede ferroviaria interior do porto exterior de Punta Langosteira, cun orzamento de 27,5 millóns de euros que serán financiados con cargo aos fondos Next Generation.

Segundo informa a entidade, as empresas interesadas terán un mes para presentar as súas ofertas e o prazo máximo de execución das obras será de 23 meses. Os traballos, engade, “comezarán no primeiro semestre de 2024 e concluirán antes do verán de 2026”, data na que “se prevé que termine tamén a construción da ligazón que conecta coa rede xeral, que está actualmente en execución”.

O proxecto, cuxa licitación foi aprobada recentemente polo Consello de Administración da Autoridade Portuaria, recolle a execución da infraestrutura completa, apta para permitir as manobras dos trens no seu ciclo de carga, descarga e transporte das mercadorías.

Para o presidente da Autoridade Portuaria, Martín Fernández Prado, a licitación desta obra supón “un paso importante na conectividade do porto exterior”, en canto a que “se cumpre o cronograma previsto para pór en servizo en 2026 o transporte ferroviario en Punta Langosteira”.