O maxistrado do Xulgado do Contencioso-administrativo número 2 da Coruña rexeitou a suspensión da adxudicación, por parte do Concello da Coruña, do contrato do servizo de recollida, transporte, mantemento e residencia de animais domésticos.

O xuíz entende que non procede a adopción da medida cautelar, que foi solicitada por Mais Coidados Multiservicios S.L.U. No auto, explica que a empresa fai referencia a “un dano ou prexuízo irreversible” de non acordarse a suspensión, pero en ningún momento o acredita, nin sequera indiciariamente, “máis aló do feito de non ser adxudicataria do contrato”. Ademais, salienta que, se se acollese o recurso presentado por Mais Coidados Multiservicios contra a adxudicación, a empresa sería resarcida mediante a correspondente indemnización.

O maxistrado resalta que neste momento procesual non se dispón do expediente administrativo e non procede, en ningún caso, examinar os “pretendidos vicios de procedemento” que relata a empresa. “A prolixa alegación na que se pretende fundar a pretensión cautelar accionada non é senón unha extensa invitación a entrar no exame do fondo do litixio, invitación que ha de rexeitarse”, destaca o xuíz no auto, contra o que cabe presentar recurso de apelación.