Os alugueres por tempada na Coruña incrementáronse un 290% fronte a Ourense cidade onde esta modalidade é practicamente “inexistente” e o seu peso sobre o mercado rolda o un por cento, segundo o último informe publicado polo portal inmobiliario idealista.

Nun comunicado, sinala que os alugueres por tempada están a ser un dos principais protagonistas desde a aprobación da Lei de Vivenda e no terceiro trimestre de 2023 alcanzan ao 10% de todas as vivendas no mercado estatal.

O crecemento deste tipo de alugueres, engade, disparouse durante o terceiro trimestre, coincidindo co período tras a aprobación da lexislación en materia de alugueres, e a oferta aumentou un 39%.

Os maiores e “máis espectaculares” incrementos de oferta deste tipo déronse en pequenos mercados onde este fenómeno era ata agora “practicamente inexistente” e nos que a aparición dun puñado de anuncios provocou subidas moi pronunciadas. Este é o caso da Coruña cunha subida do 290%.

En paralelo a estes crecementos, os alugueres de longa estancia — as rexidas pola Lei de Arrendamentos Urbanos — seguíronse reducindo (-1%) desde a entrada en vigor desta norma. Nunha análise do mercado de forma interanual, explica o informe, comparando a oferta do terceiro trimestre de 2022 coa do mesmo período de 2023 as caídas son “aínda máis significativas” cun descenso do 12%. Unha das maiores baixadas prodúcense en Ourense (-28%).