Un loteiro da Coruña e o seu irmán, delegado de Lotarías en 2012, serán xulgados en relación ao caso dunha primitiva millonaria por importe de 4,7 millóns de euros, despois de que a Audiencia da Coruña desestimase os recursos de apelación interpostos por ambos contra a resolución do Xulgado de Instrución número 8 da cidade herculina.
Pola contra, estima o recurso de apelación formulado pola Avogacía do Estado e acorda o sobresemento provisional da causa respecto doutros catro investigados, altos cargos de Lotarías do Estado no momento duns feitos que se remontan a fai dez anos.
Con varias persoas que se postularon como posibles donos e co argumento do loteiro de que non aparecera o propietario do mesmo, por estes feitos púxose en marcha unha investigación policial.
Antes, ao ano seguinte de selarse o boleto, o Concello da Coruña iniciou un “expediente de achado” para buscar ao gañador do billete premiado, que o loteiro dixo atopar na súa administración da praza de San Agustín, na Coruña.
Con posterioridade, iniciouse a investigación policial. Nela, cuestionouse a versión facilitada polo home sobre o achado casual do boleto premiado chegando a considerar que lle ocultou o premio ao verdadeiro dono, apuntando a investigación a un lexítimo propietario, xa falecido.
Tampouco se descartou posibles responsabilidades por parte do seu irmán e de representantes de Lotarías do Estado no momento dos feitos, no caso destes últimos sobre os que agora se acorda o sobresemento provisional.
