A alcaldesa da Coruña, Inés Rey, asegurou que o Concello estará “vixiante” para que se garantan os servizos mínimos durante a folga “intermitente e indefinida” convocada polo comité de empresa da concesionaria do servizo de recollida de lixos da cidade herculina a partir da medianoite do día 24, Tamén, engadiu, para que transcorra “sen incidentes”.
“É un tema profundamente delicado, no que tamén a salubridade da cidade e dos cidadáns está en xogo”, destacou a rexedora a preguntas dos xornalistas sobre este asunto tras a presentación dunha nova edición da carreira San Silvestre. “Nós o que imos esixir é que se cumpran eses servizos mínimos“, asegurou tras lembrar que o servizo de recollida e de limpeza viaria son “dous contratos que ten unha concesionaria”, en alusión a Prezero.
APERTURA DO TÚNEL SOL E MAR
Noutra orde de cousas, cuestionada polo anuncio de apertura do túnel do Sol e Mar, no municipio coruñés de Oleiros, o día 21, Rey indicou que non ten coñecemento “das obras dos concellos limítrofes”.En todo caso, aventurou que “haberá menos atascos” e instou ao Goberno autonómico a “tomarse en serio” as conexións da Coruña e a súa área metropolitana e a constituír o consorcio metropolitano de transportes e mellorar as liñas.
