A subdelegada do Goberno na Coruña, María Rivas, apelou á “profesionalidade” da Policía Nacional ao ser cuestionada, nun acto en Ourense, pola morte dun home por disparos dun axente na cidade herculina tras, previamente, segundo fontes policiais, agredir cunha barra de ferro. “No momento en que se producen estas situacións, a Policía Nacional reacciona con toda a súa profesionalidade”, sentenciou para incidir en que son situacións “que non nos gustan”.

“Prodúcese unha situación e reacciónase con todos os instrumentos“, asegurou para rexeitar as denuncias sobre un posible caso de racismo. “A Coruña é unha cidade moi tranquila e o que hai é que lamentar é que se produzan esas situacións”, engadiu tras esa morte o día de Nadal e previamente a dun mozo apuñalado mortalmente na madrugada de Noiteboa.