O Xulgado de Instrución número 3, en funcións de garda, decretou o ingreso en prisión para o home detido o mércores na Coruña tras unha persecución da Policía Nacional ao detectar a súa presenza e constatar que se lle buscaba por requisitorias xudiciais pendentes. Así o informaron fontes do Tribunal Superior de Xustiza de Galicia (TSXG) que explicaron que se acordou o seu ingreso en prisión polas tres requisitorias que tiña en vigor de detención e ingreso en prisión, unha de Betanzos e dúas da Coruña.

Son por delitos de quebrantamento de condena, condución sen permiso e condución temeraria. Tamén se lle ofreceu prestar declaración por unha causa que ten en Carballo por conducir sen licenza, pero acolleuse ao seu dereito a non declarar. O home ten tamén causas abertas noutros xulgados da cidade por delitos contra a seguridade viaria e furtos.

Os feitos producíronse a media tarde do mércores despois de que axentes da Policía Nacional decatásense da presenza do arrestado nun vehículo, no que ía tamén unha muller. O coche foi perseguido pola Policía Nacional na zona da avenida de Alfonso Molina. Xa no aparcadoiro do hipermercado Carrefour foron interceptados e, aínda que o home tentou fuxir, foi finalmente detido. No caso da muller, que era a que conducía, desde o TSXG precisouse que pasará a disposición xudicial pola tarde, investigada, inicialmente, por tentativa de homicidio e condución temeraria.