Un xulgado coruñés recoñeceu o dereito a realizar a xornada laboral en formato de teletraballo a unha empregada dun servizo de atención telefónica con sede na Coruña para atender as obrigacións familiares de coidado da súa nai. Segundo informou UGT, o Xulgado do Social número 4 da Coruña obriga á empresa Atento “a recoñecer o dereito a prestar os servizos na modalidade de teletraballo os cinco días da semana“.
Conclúe que a traballadora “acreditou, de maneira suficiente, que a súa nai se atopa necesitada de supervisión tanto en función da súa idade como das diversas patoloxías que padece como, por outra banda, xustificou desde o ano 2012, data a partir da cal se lle recoñece a redución de xornada“.
A organización sindical lembra que en 2012 esta traballadora tivo que recorrer a reducir a súa xornada para o coidado da súa proxenitora. “O pasado mes de agosto solicitou á empresa Atento o poder realizar as súas tarefas en modo traballo a distancia”, segundo explica, e a empresa denegou a solicitude alegando “graves prexuízos na organización do traballo”.
