Unha esteticista da Coruña foi condenada por intrusismo profesional “ao efectuar prácticas propias dun podólogo sen a titulación habilitante“, informa o Colexio de Podólogos de Galicia que formalizou a denuncia.

Faino tras un xuízo celebrado no Xulgado do Penal número 3 da Coruña no que a denunciada aceptou unha condena “de seis meses de prisión” por un delito de intrusismo profesional, “ao exercer prácticas profesionais propias dun podólogo ou podóloga nunha barbaría, situada na Coruña e rexentada por un familiar”.

“A acusada, coñecedora de que carecía da titulación habilitante segundo a Lei 44/2003 de ordenación das profesións sanitarias, desenvolvía e publicitaba na súa carta de servizos estas prácticas podológicas, ademais de estar publicitadas tamén nun cartel exterior da barbaría”.

“Realizáronse labores de pedicura con bisturí, tratamentos de patoloxías do pé, como callos, papilomas, durezas ou uñas encarnadas con fungos desde maio de 2016 ata o 3 de marzo de 2021″, expón a entidade colexial.

“A sentenza, firme e sen posibilidade de presentar recurso, impón á acusada unha pena de seis meses de prisión e a inhabilitación como profesional de estética e de xerente polo mesmo tempo que dure a condena”. A defensa solicitou a suspensión da pena e o xuíz accedeu quedando condicionada a que a acusada se absteña de delinquir polo prazo de dous anos.