Resonac impulsará na Coruña unha planta piloto para a fabricación de grafito para baterías de coches eléctricos, en instalacións da antiga planta de Alu Ibérica e que estará operativa en 2025, segundo as previsións da empresa. Así o informou o presidente e CEO de Resonac en Europa, César Castiñeira, quen, con motivo da visita que o presidente da Xunta, Alfonso Rueda, realizou ao centro, informou da aprobación dun investimento de dez millóns de euros para a citada planta.
“Para avanzar na viabilidade técnica e económica da produción deste produto a gran escala”, sentenciou tamén, explicando que no segundo semestre deste ano iniciarase o acondicionamento dunha das naves do recinto da antiga Alu Ibérica. A posta en marcha estímase para a segunda metade de 2025. Tras o encontro con Rueda e a conselleira de Economía e Industria, María Jesús Lorenzana, explicou que, con este investimento, búscase implantar unha planta piloto que permita completar o proceso de produción de grafito para ánodos de baterías de coches eléctricos de maneira íntegra na súa planta da Coruña.
Nestes ensaios, participarán sete persoas na Coruña, ás que se suman outras sete en Xapón. Todo iso para uns traballos que permitan a homologación do produto, apuntou. No acto, o presidente da Xunta reivindicou, á súa vez, a importancia da actividade desta empresa e da planta piloto que proxecta de face a construír “esa Galicia potente que queremos”. Ademais, aproveitou para volver reclamar un estatuto para as empresas electrointensivas.
